Gazetari Tomorr Avdija është shprehur se shefi i Politikës së Jashtme të BE-së, Josep Borrell, ka mbajtur qëndrime të njëanshme lidhur me situatën e tensionuar në veri të Kosovës.
Komentet Avdija i bëri përmes një interviste në Panorama TV, ku tha se Borrell ka deklaruar se nuk duhet të arrestohen kriminelët në veri të Kosovës.
Ai shtoi se lidhur me qëndrimin e SHBA-ve në zgjidhjen e krizës nuk kishte kritika dhe shtoi më tej se Shtetet e Bashkuara kanë pasur një rol vendimtar gjatë këtyre ditëve.
“Policët e Kosovës duke shërbyer në Veri janë rrëmbyer nga forcat serbe. Pas këtyre veprimeve, e gjithë situate ka marrë një rrjedhë që ka çuar në përplasje të fortë mes dy vendeve. Kurti e quajti aktin terrorist. Ajo çka ka ndodhur sot me lirimin e 3 policëve është një arritje me ndihmën e presionit ndërkombëtar ndaj Beogradit. Në ditët e para Beogradi ka tentuar njëfarë shkëmbimi për lirimin e tij. 3 policët kanë qenë në detyrë zyrtare dhe nuk kanë bërë asnjë akt jashtë kufirit. Gjykata i ka lënë të lirë dhe duhet të paraqiten herë pas here në gjykatë. Por ata nuk do i përgjigjen më gjykatave të Serbisë. Ministri i Brendshëm i Kosovës ka theksuar se Kosova do të vijojë me operacionet në very të vendit për të spastruar gjithë bandat që operojnë atje.
Kjo është vizita më e rëndësishme që Kurti po zhvillon në 3 muajt e fundit, pra vizita në Londër është e rëndësishme sepse pas vendosjes së kryetarëve të Komunave në veri, ka pasur njëlloj izolimi të Kurtit, por që në të vërtetë nuk ka ndodhur dhe kjo po duket nga takimet e sotme. Borrell ka pasur një lloj animi le të themi të palogjikshëm gjatë dialogut. Është i palogjikshëm sepse nëse në një pjesë të territorit nga ku ai vjen do të ketë persona të rrezikshëm, shteti i tij do i dërgonte pas hekurave. Ka pasur një deklaratë të tij që ka thënë se Kosova nuk duhet t’i arrestojë kriminelët në veri të vendit, duhet të tregohet e kujdesshme. Por edhe zëdhënësi i tij i është drejtuar duke sulmuar vetëm një palë, Kosovën.
Unë nuk kam kritika ndaj qëndrimeve të SHBA-së. SHBA ka luajtur një rol vendimtar gjatë këtyre ditëve. Lajçak dhe Borrell kanë bërë deklarata vetëm kundër Kosovës. Ju e keni parë si janë sulmuar trupat e NATO-s në veri dhe civilët atje. Negociatori duhet të jetë i balancuar dhe të ketë edhe notat e kuptueshme nëse do të arrijë diçka mes palëve. Dialogu ka hyrë në një krizë të thellë”, është shprehur Avdija.
